Schö wars aa mit de vuin Viecher
Schö wars aa mit de vuin Viecher, wo mir ghabt ham. D Ochs ham mit eahnere broatn Hirn und an dickn Gnack an Pflouch und d Wagn zogn, Kehj han gekälbert und d Muich gebn, d Henna ham d Ojer glegt und Ziwala ausbrüt, wenn da Gockl recht fleiße war, de Taubn ham oa jungs Paar ums andere aufzogn. Wenn so weit war, hamas gköpft, gerupft und ausgnumma und am anderen Tag aufn Schuiweg fürn Amtsrichter oder an Hofrat zuatragn. Kost hams a Mark zwanzg und a Zehnala hama Trinkgöid krejgt. Da Hund is anara Kettn gehägt und hat bloß belln braucha. Katzn hama scho mehrer braucht, weil die ums Haus rum de Ratzn und im Stodl drin de Meis ham fanga müassn.
Autor: Hubert Hopfner
Quelle: Auszug aus Buch – Lacha dade, erschienen 1990, Seite 15f
Sprecher: Werner Kränzlein, https://landvilla-studio.de/
Die Nutzung erfolgt mit freundlicher Genehmigung von Familie Hopfner
